sinema

Obra teatru hatudu espionajen australianu iha Timor-Leste iha negosiasaun fronteira nian

SAPO TL, 18 de abril de 2018

  • Foto@Hon Boey/Lusa

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Asaun hosi grupu ida ajente australianu sira nian ne'ebé iha tinan 2004 aproveita ona supostu programa hosi asisténsia humanitáriu hodi tau sistema espionajen ida iha Palásiu Governu nian iha Timor-Leste hanesan tema hosi pesa foun hosi teatru australianu.

"Greater Sunrise" - ne'ebé hanesan mós naran hosi projetu petrolíferu ida iha Tasi Timor - hakerek hosi Zoe Hogan, ne'ebé hela no serbisu ona iha Timor-Leste entre tinan 2011 ho 2012 (iha ámbitu hosi programa voluntáriu sira Governu australianu nian).

Eskándalu hosi espionajen ne'e hanesan tema ba istória ida ne'ebé sai ona hanesan tentativa ida hodi hakerek kona-ba estranjeiru ida nia moris iha Díli no hafoin ne'e hatudu "oinsá Austrália hasoru Timor-Leste, liuliu hafoin independénsia".

Hogan esplika ba Lusa, iha entrevista liuhosi telefone hahú hosi Sydney, katak antesedente sira "hanesan xokante" no reprezenta "violasaun loloos ida hosi Austrália ba lei internasional", maski iha prátika hanesan "triste no hatudu deziluzaun" no hanesan tan ezemplu ida "hosi nasaun boot ida ne'ebé aproveita nia viziñu ki'ik ida".

Kazu, ne'ebé deskobre de'it iha tinan 2013, hamosu momentu ida tensaun diplomátika maka'as entre Díli ho Canberra, liuliu tanba espionajen ne'e halo bainhira nasaun rua halo hela negosiasaun ba fronteira tasi nian.

Ema ne'ebé fó sai espionajen, koñese de'it hanesan Sasin K, kontinua laiha pasaporte, iha Austrália, hetan bandu hodi labele sai hosi nasaun.

Canbera antes lakohi aseita liña medianu hosi fronteira sira no insisti iha divizaun ida hosi reseita sira Tasi Timor nian hosi rekursu sira ne'ebé hetan hosi parte timoroan nian, asaun ida ne'ebé, iha tinan ne'e, lakon ona ho asinatura hosi tratadu foun ida.

Tratadu ne'e, asina iha loron 06 Marsu iha Nova Iorke, tau ona liña ne'ebé Timor-Leste antes reklama ona, nune'e implika atu posu sira ne'ebé hetan esplorasaun, ne'ebé antes tenki fahe reseita sira ho Canbera, agora hanesan tomak ba Timor-Leste.

Kalkula katak reseita timoroan sira ba posu sira ne'e hamutuk dolar biliaun lima resin tama tiha ona ba kofre australianu sira.

Ho esperiénsia iha sinema ho palku - hanesan atór ida iha filmi boot rua ne'ebé halo iha Timor-Leste (Balibo ho A Guerra de Beatriz) - ator úniku timoroan ne'ebé halo parte iha pesa ne'e, José da Costa, destaka katak pesa ne'e hatudu asuntu ida ne'ebé la'ós koñesidu ba ema barak iha Austrália.

"Parese hanesan subar asaun balun. Iha ema barak maka hafoin haree pesa ne'e husu liután informasaun. Obra ne'e tuir istória halo ho baze iha asaun real sira maibé hafoin ne'e tenki fó liután esplikasaun", nia hatete ba Lusa.

Akontese mós ho joven barak iha Timor-Leste ne'ebé labele hatene dimensaun sira hosi asuntu ida kompleksu, nune'e "hanesan importante hatudu mós pesa ne'e" iha Timor-Leste.

Hogan rejeita pozisaun hosi ema sira ne'ebé, iha Governu australianu, defende katak Timor-Leste tenki agradese apoiua ne'ebé Austrália fó nafatin ba nasaun, hodi insisti katak kestaun ne'e hanesan extensu.

"Ne'e hanesan kestaun ida justisa nian no la'ós kona-ba karidade ka jenerozidade", nia hatete.

Maski koñese ativista timoroan barak ne'ebé envolve iha kazu Timor-Leste nian, Hogan admiti katak iha públiku, iha jeral, bele laiha koñesimentu maka'as kona-ba kazu ne'e no kona-ba realidade timoroan nian.

Maski inspira iha eventu real sira, autor insisti katak istória liuliu hanesan fiksaun, lahó baze iha ema ida nia moris loloos. Hanesan pozitivu tanba iha palku iha ator timoroan ida, nia hatete.

"Ami sei la halo pesa bainhira laiha ator timoroan ida. Istória ne'e iha lian tétun barak, furak tebes rona tétun iha palku ida iha Sydney, ne'ebé públiku barak nunka rona lian ne'e", nia esplika.

"Ha'u hanoin katak hanesan ba dala uluk maka produsaun ida iha palku ida iha Sydney iha lian tétun. Hanesan importante tebes bele promove ita nia lian iha espetákulu ida ho públiku barak. Iha konversa sira ho públiku, ema barak hatete katak gosta rona lian ne'e", José da Costa hatete.

Objetivu maka lori istória ne'e ba sidade australianu sira seluk liuliu ba Melbourne ho Darwin maibé mós to'o Timor-Leste.

Istória ne'e sei kontinua iha Belvoir Theatre to'o loron 21 Abril.

Fonte: Agência Lusa

komentáriu sira