sinema

"Game of Thrones" lori Emmy iha Série Drámatika di'ak liu, “Fleabag” ho “Chernobyl” manán iha kalan ne'e

SAPO TL, 23 de setembru de 2019

  • Foto@Nina Prommer/EPA/Lusa

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Serimónia hosi prémiu sira Emmy nian ba dala 71 fó ona prémiu iha madrugada loron-segunda ne'e ba "Game of Thrones" hanesan Série Dramátiku Di'ak Liu iha tinan ne'e, taka ho estatueta hamutuk 59 ne'ebé maka entrega hosi Akademia Televizaun nian durante temporada ualu hosi saga ne'e.

"Fleabag" simu Emmy ba Série Komédia di'ak liu ho "Chernobyl" konkista ona prémiu Minisérie Di'ak Liu, ho sira rua lori estatueta oioin iha respetiva kategoria sira, sai nune'e hanesan vensedor sira maka'as liu iha kalan ne'e.

Durante oras tolu serimónia nian, ne'ebé iha tinan ne'e laiha aprezentador, sai klaru katak "Game of Thrones" laiha kalan gloriozu nian ne'ebé maka bele kalkula tanba hanesan temporada ikus.

Bainhira atór Michael Douglas anunsia distinsaun hosi Série Dramátiku Di'ak liu, ba dala haat maka Emmy ne'e entrega ba kriador sira hosi títulu HBO nian, halakon ona dúvida ne'ebé maka mosu iha Microsoft Theater, iha Los Angeles, durante kalan tomak: maski halo rekord ba série ida ne'ebé hetan liu prémiu, "Game of Thrones" lakon ona kuaze estatueta tomak ba nomeasaun ne'ebé nia halo parte iha tinan 2019.

Série ne'e simu de'it prémiu Emmy rua, ho Peter Dinklage ("Tyrion Lannister") sai hanesan atór úniku ne'ebé manán iha kategoria hosi reprezentasaun ne'ebé nia tama iha nomeasaun, Atór Sekundáriu Di'ak liu iha Série Dramátika ida.

Entre Emmy sira hosi reprezentasaun, realizasaun ho argumentu, série ne'ebé kria hosi David Benioff ho D.B. Weiss lakon hasoru ho "Killing Eve", "Pose", "Ozark" ho "Succession", hafoin temporada ikus ida ne'ebé hamosu reasaun oioin hosi parte krítika ho espetador sira.

Maski nune'e, "Game of Thrones" manán ona iha kategoria ne'ebé maka ema buka liu, ne'ebé konkore ho "Better Call Saul", "Bodyguard", "Killing Eve", "Ozark", "Pose", "Succession" ho "This Is Us".

Tau hamutuk ho prémiu sanulu ne'ebé entrega iha semana liubá durante Creative Arts Emmy, temporada ualu ho ikus hosi série simu total ida estatueta hamutuk 12, no sai hanesan série ne'ebé simu liu prémiu iha edisaun ba dala 71 hosi prémiu sira.

Iha diskursu vitória nian, David Benioff agradese ona ba George R.R. Martin tanba kria ona universu ne'e no aposta ona iha produtór na'in rua ne'ebé maka sira nunka halo antes.

"Hanesan inkrível atu imi hotu sei moris hela", hatete hosi D.B. Weiss, hafoin felisita esforsu hosi ekipa produsaun ho atór sira, ne'ebé filma ona temporada ikus iha kondisaun sira ne'ebé susar tebes, ho loron 70 konsekutivu iha temperatura sira ne'ebé malirin tebes iha Belfast, Irlanda.

"Tinan sanulu ikus ne'e hanesan tinan di'ak liu iha ita nia moris, no ba ema toma ne'ebé maka serbisu ona iha ne'e, ha'u la fiar katak ita hakotu ona, ha'u labele fiar katak ita halo ona", Benioff hatete.

Iha kalan boot liu televizaun nian iha Hollywood, série "Fleabag", kria ho halo hosi Phoebe Waller-Bridge, sai hanesan surpreza boot ida ba konsisténsia hosi distinsaun sira: Emmy haat iha kategoria sira komédia nian.

Títulu hosi Amazon Prime Video lori ona estatueta hosi Série Komédia Di'ak liu ba uma, halakon nune'e "Barry", "The Good Place", "The Marvelous Mrs. Maisel", "Russian Doll", "Schitt's Creek" ho "Veep".

Phoebe Waller-Bridge manán mós Emmy ba Atríz Di'ak liu iha Série Komédia nian no Eskrita Di'ak liu ba Série Komédia ida nian, ho Harry Bradbeer lori estatueta hosi Realizasaun Di'ak Liu iha Série Komédia ida nian ho "Fleabag".

Iha kategoria sira hosi Minisérie ka Filmi ba Televizaun, Chernobyl", hosi HBO, maka lori ona prémiu ne'ebé maka ema hotu hakarak, manán Eskrita Di'ak liu ba Minisérie ka Filmi ho Realizasaun Di'ak liu iha Minisérie ka Filmi, aleinde Minisérie ne'ebé Di'ak liu. Tuir "Game of Thrones", sai hanesan série daruak ne'ebé hetan liu prémiu iha kalan rua entrega Emmy nian, ho total ida estatueta 10.

Tuir "The Marvelous Mrs. Maisel", ho ualu, "Free Solo", ho hitu, ho "Fleabag", ho neen.

Emmy sira, tanba númeru barak hosi kategoria sira, baibain entrega iha serimónia rua, ho serimónia daruak transmiti iha diretu hahú hosi Los Angeles.

"Last Week Tonight With John Oliver" hetan Emmy ba Outstanding directing for a Variety Series - ‘talk show’ ho "Saturday Night Live" simu prémiu hosi Série Variedade oioin Di'ak Liu - ‘sketch’. "Bandersnatch (Black Mirror) sai hanesan Filmi Di'ak liu ba Televizaun.

Fonte: Ajénsia Lusa

komentáriu sira