sinema

Dokumentariu no livru konabá diplomata Sérgio Vieira de Mello lansa iha Brazil

Sapo TL, 08 de agostu de 2018

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Iha loron-tersa ne'e, iha São Paulo, lansa dokumentariu ida no livru ida konabá trajetória brazileiru Sérgio Vieira de Mello nian, responsavel ba misaun ONU nian iha Timor-Leste, entre tinan 1999 no tinan 2002.

Ho naran "Sérgio Vieira de Mello: legado de um herói brasileiro", projetu ne'e konsentra iha pasajen markante tolu, Timor-Leste, Kamboja no Vietname, kareira diplomata ne'e nian, ne'ebé serbisu tinan 34 iha ONU no mate iha atentado ida kontra prédiu instituisaun nian iha Bagdade, kapital Iraque nian, iha tinan 2003.

Diretor filme ne'e, André Zavarize, konta ba Lusa katak projetu ne hahú iha tinan lima liubá bainhira Ajénsia ZAZ, ne'ebé organiza projetu kultural sira iha Brazil, disidi halo livru iha ho omenajen ba diplomata ne'e.

Pontu importante ida hosi projetu ne'e maka, funsaun Sérgio Vieira de Mello nian iha re-organizasaun Timor-Leste nian hafoin independensia, iha tinan 1999, diretor ne'e mós hatete katak brazileiru ne'e, to'o ohin loron, ema hotu sei hanoin nia hanesan ema ida ne'ebé transforma nasaun ne'e.

"Bainhira Sérgio to'o iha Timor-Leste, fatin ne'e hanesan rai ida ne'ebé destruidu los. Iha de'it jerador ahi nian ida ba nasaun laran tomak no infraestrutura sira ne'e hetan estragu hotu hosi ezérsitu Indonezia nian. Hafoin serbisu tinan rua, ONU realiza, ho nia komandu, prosesu hodi tau instituisaun hanesan Justisa, Poder Ezekutivu, Poder Legislativu no Tropa ba Paz sira", hatete.

"Ami konta ituan konabá serbisu sira ne'e (iha livru no iha dokumentariu). Ami mós entrevista antigu primeiru-ministru Timor-Leste nian Mari Alkatiri, no mós reitor Universidade Nasional Timor Lorosae nian, Francisco Miguel Martins. Ami mós koalia ho personalidade sira na'in 60, ne'ebé inklui mós ho manan-nain prémio Nobel timoroan na'in rua , ex-primeiru ministru José Ramos-Horta no bispo Ximenes Belo", akresenta.

Iha prefásiu livru nian, José Ramos-Horta refere katak pedidu ne'e halo ba antigu sekretariu ONU nian Kofi Annan hodi bele nomeia iha lideransa ONU nian iha nasaun ne'e ema ida ne'ebé maka iha fuan no koalia lian portuguéz.

"Ha'u koalia ba Kofi Annan katak timoroan hanesan povu ida ne'ebé trauma ho konflitu sira, sofrimentu sira no violénsia. Ami presiza reprezentante espesial ida ne'ebé laos burokrata no la iha fuan (...) Ho ida ne'e, Kofi Annan hatene sé maka nia atu hili. Sérgio Vieira de Mello hanesan ema ida ne'ebé maka kompleta figura umanu no hau sente ideal ba Timor-Leste", hakerek.

Dokumentariu no livru ne'e koalia konabá serbisu diplomata brazileiru nian ne'ebé maka halao iha Kamboja hosi ONU, hodi estabelese negosiasaun ba paz ho rejime Red Khmer nian, bainhira iha Vietname, Sérgio Vieira de Mello mós ajuda refujiadu sira hamutuk millaun ida ne'ebé halai hosi konflitu iha sira nian rejiaun.

Iha projetu ne'e, situasaun imigrante venezuelanu sira, ne'ebé maka halai hosi krize ekonómika no sosial iha sira nian nasaun, ba Brazil dezde tinan 2017, hetan fatin espesial iha iha projetu ne'e. Sérgio Viera de Mello mosu hanesan ezemplu ema ida ne'ebé maka serbisu afavór ba refujiadu sira iha mundu tomak.

Dokumentariu no livru "Sérgio Vieira de Mello: o legado de um herói brasileiro" ne'e mós sei fó sai no lansa iha loron 16 oinmai, iha Riu-Janeiru.

Fonte: Ajénsia Lusa

komentáriu sira