múzika

Mate ona Dolores O'Riordan, vokalista hosi The Cranberries

SAPO TL, 16 de janeiru de 2018

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Vokalista hosi banda irlandeza The Cranberries, Dolores O'Riordan, mate ona iha loron-segunda, "derepente", iha Londres, ho tinan 46, fó sai hosi nia ajente.

"Vokalista hosi banda The Cranberries iha Londres hodi halo sesaun gravasaun badak ida", hakerek iha komunikadu ida hosi ajénsia Lindsey Holmes Publicity, ne'ebé haktuir hosi AFP.

Harii iha tinan 1989, banda 'pop/rock' sai koñesidu iha mundu iha dékada 1990, ho álbum "Everybody Else Is Doing It, So Why Can't We?".

"Something Else" hanesan álbun foun hosi banda, edita iha fulan-Abril tinan liubá, ne'ebé inklui tema foun tolu no ne'ebé vizita fali sira nia susesu balun, akompaña ho Orkestra Kámara Irlandeza.

Iha komunikadu ne'ebé fó sai, ajénsia afirma katak "família senti triste ho husu atu respeita privasidade hosi momentu susar ne'e".

The Cranberries, ne'ebé protagoniza ona susesu sira hanesan "Zombie", "Dreams" ka "Linger", fa'an ona iha mundu tomak disku hamutuk millaun 40 resin, fó sai hosi Efe iha notísia.

Banda irlandeza fahe malu iha tinan 2002, halibur hamutuk fali iha tinan 2009, hodi hala'o nune'e digresaun mundial ida, ne'ebé liuhosi Portugal. Iha tinan 2012, edita ona álbum "Roses".

Iha fulan-Maiu liubá banda hahú ona digresaun europeia ida, maibé kansela ona atuasaun balun tanba problema saúde hosi vokalista.

Dolores O'Riordan moris iha Limerick, iha sudueste Repúblika Irlanda nian. Durante tinan sira ne'ebé maka halo intervalu hosi banda, nia edita ona álbun mesak rua, "Are You Listening?" (2007) ho "No Baggage" (2009).

Fonte: Lusa

komentáriu sira