múzika

Konsumu múzika sai baratu liu maibé hanesan mós poluente

SAPO TL, 08 de abril de 2019

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Sosa no rona múzika agora sai baratu liu tanba Internet maibé mós iha impaktu boot ida iha ambiente tanba konsumu enerjia poluente, haktuir hosi estudu ida ne'ebé fó sai iha loron-segunda ne'e hosi Universidade Glasgow, iha Reinu Unidu.

Investigasaun, ho títulu "Folin hosi múzika", analiza ona indústria diskográfiku no konsumu hosi múzika iha Estadus Unidus, hodi konklui katak konsumidor sira gasta menus ba knananuk ida ne'ebé sira rona, liuliu ho aumentu hosi serbisu sira hodi rona 'online' iha 'streamming'.

Maibé, enerjia ne'ebé gasta hodi karega bateria hosi dispozitivu tomak hodi fahe no hodi rona, hanesan telemóvel sira no komputador sira, reprezenta aumentu ida hosi emisaun hosi gás sira ho efeitu estufa iha ambiente.

Iha estudu, avansa ona informasaun konkretu sira kona-ba panorama iha Estadus Unidus: iha tinan 1977, iha nível aas hosi fa'an disku vinil, konsumu múzika hetan ona dióxidu karbonu hamutuk kilo millaun 140, maibé iha 2016, armazenamentu, transmisaun ho eskuta hosi múzika 'online' sira halo ona emisaun hosi CO2 kilo millaun 200 to'o CO2 kilo millaun 350.

Haree hosi impaktu ambiental, investigador sira aprezenta ona informasaun pozitivu ida kona-ba desmaterializasaun hosi konsumu múzika nian. Uzu hosi plástiku iha indústria diskográfiku tuun maka'as ba kilo millaun ualu, iha tinan 2016, bainhira iha tinan 1977 maka iha kilo millaun 58 ne'ebé produzidu no utilizadu.

Iha tinan 1988, momentu ne'ebé mosu uzu ho sosa kasete sira, indústria diskográfiku uza ona plástiku kilo millaun 56 no produz ona gás poluente hamutuk kilo millaun 136. Iha tinan 2000, konsidera hanesan períudu ne'ebé fa'an makás CD, folin sira aumenta ba plástiku kilo millaun 61 no emiti ona CO2 hamutuk millaun 157.

Ajusta ba inflasaun no ba folin atual hosi osan iha Estadus Unidus, kalkula ona folin sira sosa múzika nian iha suporte sira ne'ebé la hanesan. Silindru ida hosi fonógrafu iha tinan 1907 iha folin dolar 13,8 (euro 12,3), disku ida hosi goma laka (iha tinan 1947) nia folin maka euro 9,7, vinil ida (iha tinan 1977) maka euro 25,4, kasete ida iha tinan 1988 kusta euro 14,8, CD ida (iha tinan 2000) nia folin maka euro 19,2 no álbun dijital ida (iha tinan 2013) nia folin maka euro 9,9.

Estudu, bainhira aprezenta informasaun sira ne'e, lakohi muda ema sira nia hanoin hodi rona múzika, maibé hein atu "hetan konsiénsia hosi mudansa sira folin nian ne'ebé envolve iha konsumu", afirma hosi investigador Matt Brennan, ne'ebé haktuir hosi Universidade Glasgow nian.

"Ami hein atu informasaun sira ne'e hamosu mudansa ida hodi hili konsumu sira ne'ebé sustentável liu no serbisu sira ne'ebé fó osan ba autor sira, iha tempu hanesan hamenus impaktu ambiental", refere hosi responsável investigasaun nian.

Fonte: Ajénsia Lusa

komentáriu sira