múzika

Izrael konsidera halo Eurovizaun iha Tel Aviv ka Haifa, aleinde Jeruzalén

SAPO TL, 12 de juñu de 2018

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Izrael admiti katak sidade sira Tel Aviv, Haifa no Eilat, aleinde Jeruzalén, hanesan mós kandidatu hodi hala'o Festival Eurovizaun Múzika nian iha 2019, fó sai hosi jornal israelita Haretz iha loron-tersa ne'e.

Proposta akontese hafoin ezijénsia hosi Uniaun Europeia Radifuzaun nian (UER/EBU, iha sigla lian inglés), ne'ebé hakarak atu festival hala'o iha fatin ida "ladún polémiku" duké Jeruzalén, sidade ida ne'ebé fahe malu entre ema israelita sira ho palestinianu sira dezde tinan 1967, no ne'ebé maka komunidade internasional la rekoñese soberania Izrael nian.

Primeiru-ministru israelita, Benjamin Netanyahu, konkorda ona katak governu sei hadook aan hosi eskolla hosi sidade ne'ebé sei hala'o festival, tanba vitória hosi Netta Barzilai, iha Lisboa, ho tema "Toy" iha inísiu fulan-Maiu.

Tuir jornal israelita, Netanyahu foti desizaun ne'e ho ministru sira Finansa ho Komunikasaun nian, Moshe Kahlon ho Ayoub Kara, no ho prokurador jeral Estadu nian, Avichai Mendelblit.

Desizaun ne'e transmiti ba ministra Kultura ho Desportu, Miri Reguev, ne'ebé, iha semana liubá, insisti hodi hala'o festival Eurovizaun iha Jeruzalén, iha tinan 2019, hodi defende katak, karik la halo, sei laiha fatin iha nasaun.

Deklarasaun sira hosi ministra halo parte iha estratéjia hodi promovve rekoñesimentu ba soberania israelita iha sidade.

Membru sira hosi UER informa ona emisora públika israelita Kan katak laiha objesaun hasoru Jeruzalén, hanesan palku kompetisaun nian, maibé hatudu ona deskonfortu tanba politizasaun hosi prosesu.

Kanal públiku Izrael Kan ho UER sei hasoru malu iha semana oinmai, no sidade sira Tel Aviv ho Haifa, sidade rua situa iha kosta Mediteráneu, Eilat ho Jeruzalén sei tama iha ajenda, hanesan lokal posível sira hodi halo Festival Eurovizaun.

Jeruzalén simu ona Eurovizaun iha tinan 1979 no 1999, maibé polémika foun kona-ba nia "status quo" hamosu tensaun foun sira iha konflitu israelo-palestinianu, no iha konsensu internasional kona-ba sidade.

Iha fulan-Dezembru, Donald Trump anunsia transferénsia embaixada norte-amerikanu nian ba Jeruzalén, iha rekoñesimentu izoladu ida hosi sidade hanesan kapital Izrael nian.

Instalasaun hosi departamentu diplomátiku dahuluk ida akontese iha loron 14 Maiu liubá, hamosu ona konfrontu sira, mate ona ema palestinianu na'in 60 no ema rihun rua resin kanek.

Maibé, Trump anunsia adiamentu ba fulan neen ba mudansa hosi embaixada Estadus Unidus nian hosi Tel Aviv ba Jeruzalén.

Fonte: Ajénsia Lusa

komentáriu sira