múzika

Feto na'in sia akuza kantor Plácido Domingo halo asédiu seksual

SAPO TL, 13 de agostu de 2019

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Kantor españól Plácido Domingo karik halo insisténsia seksual ba feto oioin no uza ona nia pozisaun hodi kastigu sira bainhira rekuza nia, no ajénsia notísia Associated Press fó sai iha loron-tersa ne'e relatu oioin hosi profisional sira hosi área ne'e hodi konfirma komportamentu sira ne'e.

Iha investigasaun naruk ida hosi parte ajénsia norte-amerikanu, kantora na'in ualu ho bailarina na'in ida hatete ona katak hetan insisténsia seksual hosi Plácido Domingo, iha akontesimentu oioin ne'ebé akontese durante dékada tolu nia laran, iha fatin sira ne'ebé inklui kompañia sira ópera nian ne'ebé kantor okupa kargu sira diresaun nian. Barak hatete katak hetan avizu hosi kolega sira hodi labele akompaña mesak Domingo.

Feto na'in neen seluk relata ona ba AP avansu sira ne'ebé maka hamosu deskonfortu, liuliu kantora ida ne'ebé Plácido Domingo konvida beibeik hodi sai hafoin kontrata tiha nia ba konsertu oioin iha dékada tinan 1990.

Adisionalmente, kuaze ema na'in 30 seluk ne'ebé iha ligasaun ba indústria muzikal, dezde kantor sira to'o múziku sira hosi orkestra, liuhosi profesor sira kantu nian no administrador sira, konfirma ona katak hanesan sasin ba hahalok ne'ebé hatudu insisténsia seksual hosi parte españól ho tinan 78 ne'e.

Feto ida ne'ebé akuza Plácido Domingo ba asédiu seksual konta ba AP katak españól hatama liman iha nia saia laran no feto na'in tolu seluk akuza nian hodi obriga re'i iha kamarin sira, iha kuartu ida iha hotel no iha almosu ida.

"Almosu ida la'ós hanesan estrañu", hatete hosi kantora ida. "Ema ida tenta kaer ó nia liman durante almosu negósiu ida hanesan estrañu - ka tau nia liman iha ó nia ain-tuur. Nia toka beibeik ó ho dalan oioin no re'i beibeik ó".

Hosi ema na'in sia ne'ebé akuza kantor, iha de'it meiu sopranu Patricia Wulf maka aseita divulga nia naran, no sira seluk lakohi fó sai naran tanba tauk vingansa profisional no pesoal sira.

Feto na'in hitu hosi na'in sia hatete katak fiar atu kareira sira bele hetan estraga tanba rejeita ona avansu seksual sira hosi Plácido Domingo.

Ida hatete katak iha relasaun seksual ho kantor iha okaziaun rua no ne'ebé, iha okaziaun ida, bainhira Plácido Domingo sai hosi kuartu, husik ona nota ida dolar 10 iha kómoda leten: "Ha'u lakohi atu ó sente hanesan prostituta ida maibé ha'u lakohi mós atu ó tenki selu hodi estasiona".

Kontakta hosi AP, Plácido Domingo la hatán ba kestaun espesífiku sira kona-ba akuzasaun sira, hodi deklara katak "alegasaun sira hosi ema sira ne'ebé la fó sai naran no ne'ebé maka ko'alia kona-ba tinan 30 liubá hanesan perturbador no - ho dalan oinsá aprenzentadu - hanesan la loos".

"Maski nune'e, hanesan moras tebes rona katak ha'u bele inkomoda ema ruma ka hamosu deskonfortu, la importa dura tempu hira no maski ho ha'u nia intensaun di'ak sira. Ha'u fiar katak ha'u nia interasaun sira no relasaun sira hanesan benvindu ho konsensual. Sé maka koñese ha'u ka serbisu ona ho ha'u hatene katak ha'u la'ós hanesan ema ida ne'ebé iha hanoin hodi halo terus, ofende ka halo ema seluk senti ladi'ak", hatutan hosi kantor ne'ebé hatete katak "regra sira ho padraun sira" ohin loron nian hanesan "oinseluk tebes duké iha pasadu".

Influénsia hosi kantor iha área - membru hosi konjuntu Tenor Na'in Tolu, ho José Carreras ho Luciano Pavarotti, diretor-jeral hosi Ópera Los Angeles, prezidente hosi Europa Nostra, prezidente administrasaun hosi Federasaun Internasional hosi Indústria Fonográfiku ho responsável ba konkursu Operalia, ne'ebé halo iha Lisboa iha tinan liubá - hanesan boot tebes hodi nune'e Wulf de'it maka aseita fó naran iha deklarasaun sira ba AP.

Ema barak admiti ona katak senti fortalesidu ho movimentu #MeToo no desidi ona katak dalan di'ak liu hodi ataka konduta seksual ladi'ak iha indústria maka fó sai komportamentu hosi figura ne'ebé koñesidu liu hosi ópera.

Iha fulan-Agostu tinan liubá, maestro titular hosi Orkestra Real Concertgebouw nian, iha Holanda, Daniele Gatti, hasai ona hosi kargu, hafoin fó sai akuzasaun sira ne'ebé hatete katak nia ataka ona feto na'in rua iha nia kamarin. Liutiha fulan balun, hetan kontratasaun ba Ópera Roma nian.

Maestro seluk, Charles Dutoit, hasai mós hosi orkestra oioin ne'ebé nia kolabora tanba kesar sira kona-ba hahalok ladi'ak durante dékada rua resin nia laran. Liutiha tempu balun, sai hanesan maestro konvidadu hosi Filarmónica Saun Petersburgo nian.

James Levine mós hasai ona hosi Ópera Metropolitana Nova Iorke nian, la hatene okupasaun foun sira hosi maestro nian.

Iha fulan-Dezembru 2017, ema sira ne'ebé fó sai kona-ba kazu sira insisténsia ho abuzu seksual, iha movimentu koletivu ida ho naran #MeToo, mosu iha Estadus Unidus, hetan ona nomeasaun ba "Personalidade Tinan nian" hosi revista norte-amerikanu Time.

Kazu ida ne'ebé koñesidu liu maka envolve produtro norte-amerikanu Harvey Weinstein, ne'ebé hetan akuzasaun ba insisténsia ho abuzu seksual hosi feto na'in 80 resin, entre sira maka estrela oioin hosi Hollywood, hanesan Gwyneth Paltrow, Ashley Judd ho Angelina Jolie.

Hafoin kesar sira ne'e, liuhosi investigasaun sira hosi jornal The New York Times ho revista The New Yorker, hodi halo Harvey Weinstein lakon serbisu iha empreza ne'ebé maka nia harii no hasai mós nia hosi asosiasaun oioin ho organizasaun oioin, liuliu hosi Akademia Hollywood nian, kazu sira seluk mós hahú mosu.

Entre akuzadu sira ba insisténsia ho abuzu seksual sira, no mós hahalok seksual ne'ebé ladi'ak, iha mós ator sira hanesan Kevin Spacey ho Dustin Hoffman, eis-prezidente hosi Amazon Studios Roy Price, realizadore sira Brett Ratner ho James Toback, jornalista sira Charlie Rose, Glenn Thrush ho Matt Lauer, fotógrafu Terry Richardson ho komediante norte-amerikanu Louis C.K..

Fonte: Ajénsia Lusa

komentáriu sira