múzika

Elton John anunsia despedida hosi palku ho digresaun hosi konsertu hamutuk 300

SAPO TL, 25 de janeiru de 2018

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Múziku britániku Elton John fó sai iha loron-kuarta digresaun ida ne'ebé internasional tebes, iha tinan tuirmai, antes husik duni palku sira hodi dedika ba família.

Elton John, ho tinan 70, ho kareira liu tinan 50 no fa'an disku millaun 300, fó sai iha loron-kuarta, iha konferénsia imprensa ida iha Nove Iorke, katak sei halo konsertu besik 300 iha tinan tolu nia laran no hafoin ne'e sei para halo atuasaun diretu, hodi rejeita boatu sira katak nia moras.

Digresaun sei hahú iha loron 08 Setembru iha Allentown, iha estadu norte-amerikanu Pensilvánia, no sei to'o iha Europa iha loron 02 Maiu 2019, iha Viena, Áustria. Agora daudaun seidauk iha indikasaun ba konsertu iha Portugal.

"Ha'u hanoin nafatin katak sei sai hanesan Ray Charles, BB King - iha nafatin estrada -, maibé ha'u nia prioridade sira muda ona. Ami iha oan [tinan ualu ho tinan sanulu] no ha'u muda ona ami nia moris. La signifika katak ha'u husik sai hanesan kriativu. Maibé ha'u sei la halo viajen", nia hatete no haktuir hosi BBC.

Tuir Associated Press, Elton John sei halo atuasaun iha loron-domingu iha serimónia prémiu sira múzika Grammy nian, ne'ebé sei simu medalla ida méritu nian hosi prezidénsia Estadus Unidus nian.

Rezidénsia ne'ebé nia halo iha tinan neen liuba iha Las Vegas, iha Estadus Unidus, ho títulu "Million Dollar Piano", sei hotu iha fulan-Maiu.

Elton John hahú nia kareira iha tinan 1969, tempu ne'ebé nia lansa disku "Empty Sky", no, iha kuaze tinan 50 kareira nian, tau hamutuk ho konsertu rihun haat resin, iha besik nasaun hamutuk 80.

Autor hosi knananuk sira susesu nian hanesan "Candle in the Wind", 'single' ne'ebé fa'an maka'as tebes, iha konta sira Guiness nian, "Your Song", "Can You Feel the Love Tonight" ho "Rocketman".

"Goodbye Yellow Brick Road" (1973), "Ice on Fire" (1985), "Sleeping with the Past" (1989), "The Big Picture" (1997), "Songs from the West Coast" (2001) ho "The Captain & the Kid" (2006) hanesan disku sira ne'ebé hetan liu prémiu hosi múziku britániku ne'e nian.

Elton John nia konsertu dahuluk iha Portugal halo iha edisaun dahuluk hosi Festival Vilar de Mouros iha tinan 1971.

Fonte: Ajénsia Lusa

komentáriu sira