moris di'ak

Métodu kontrasepsi evita ona inan nia mate hamutuk rihun resin iha nasaun luzófonu haat ne'ebé kiak liu

SAPO TL, 03 de novembru de 2016

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Uzu hosi métodu kontrasepsi modernu sira iha nasaun luzófonu haat ne'ebé kiak liu (Guiné-Bisau, São Tomé & Prínsipe, Timor-Leste ho Mosambike) evita ona inan nia mate hamutuk rihun resin iha tinan ne'e, haktuir hosi relatóriu ida kona-ba planeamentu família nian.

Estudu, ne'ebé hala'o hosi Family Planning 2020, inisiativu ne'ebé envolve nasaun hamutuk 36 ne'ebé iha kompromisu hodi apoia programa sira planeamentu família nian, abaliza ona progresu iha asesu no uzu hosi métodu modernu ba kontrasepsi nian iha nasaun hamutuk 69 ne'ebé kiak liu iha planeta.

Hosi nasaun luzófonu haat inklui, Guiné-Bisau ho Timor-Leste maka iha rejistu ki'ik ba uzu hosi métodu kontrasepsi nian, ida-idak ho 15,6 no 17,2 % hosi feto sira, hanesan metade hosi valor iha Mosambike (30,6%) no São Tomé & Prínsipe (31,5%).

Nasaun sira fahe ba grupu haat, relasionadu ho nível uza nian, nune'e Guiné-Bissau, Timor-Leste ho Mosambike tama iha grupu hosi nasaun sira ne'ebé "tama iha períudu ida ne'ebé bele akontese kresimentu lalais" ba uzu hosi métodu.

São Tomé & Prínsope tama entre nasaun sira "iha períudu ne'ebé kresimentu lalais akontese hanesan baibain".

Iha Guiné-Bissau, estudu kalkula katak iha feto rihun 70 maka uza métodu kontrasepsi (40% de'it hosi feto sira ne'ebé buka), no evita ona kazu isin-rua ne'ebé laiha planu hamutuk rihun 16, risku abortu rihun lima no mate hosi feto sira hamutuk 70.

Iha Timor-Leste iha utilizadora hamutuk rihun 40 resin (49,7% hosi sira ne'ebé buka), no evita ona isin-rua lahó planu hamutuk rihun 12, abortu rihun haat no evita inan sira nia mate hamutuk 10.

Iha São Tomé & Prínsipe, iha utilizadora hamutuk rihun 10 (52,6% hosi sira ne'ebé maka buka), evita ona isin-rua hamutuk rihun tolu, abortu atus ualu no inan sira nia mate hamutuk lima, bainhira iha Mosambike iha utilizadora hamutuk millaun 1,82 (51% hosi sira ne'ebé buka) no bele evita isin-rua lahó planu sira hamutuk rihun 490, abortu rihun 146 no inan sira nia mate hamutuk rihun resin.

Iha São Tomé & Prínsipe uza liu pílula (39,6%), tuir injesaun (31%) no prezervativu, iha Guiné-Bissau uza liu IUD (24,1%) hafoin ne'e uza implante (22,8%), métodu LAM (laktasaun no amenoreia) uza hosi 16,6% no prezervativu (11,7%).

Iha Timor-Leste, ne'ebé iha presaun relijiozu sira hapara métodu barak maibé uza liu injesaun (75%), pílula (7,8%), IUD (6,3%) no esterilizasaun no implante (3,9% ba métodu ida-idak), ho de'it 0,8% maka uza prezervativu.

Iha Mosambike, estudu hatudu katak métodu ne'ebé uza liu maka pílula ho injesaun (35,5% ba métodu ida-idak) no prezervativu (24.8%).

Family Planning 2020 harii hosi simeira kona-ba planeamentu família tinan 2012 iha Londres ne'ebé iha governu hamutuk 20 resin kompromete ona hodi hala'o polítika, finansiamentu, distribuisaun no obstákulu kultura sira ne'ebé maka bandu feto sira hodi hetan asesu ba métodu sira kontrasepsi modernu sira nian.

Grupu hosi apoiante ba inisiativu ne'ebé aumenta ba nasaun 36, inklui mós Bill & Melinda Gates Foundation, Department for International Development hosi Reinu Unidu, Fundu Populasaun sira nian hosi ONU no USAID.

Nasaun sira ne'ebé kompromete ba programa ne'e kontribui ona ho dolar biliaun 2,6 resin ba apoiu finanseiru bilateral ba programa sira planeamentu família nian.

Iha estudu hatete katak iha nasaun hamutuk 69 iha planeta, inklui nasaun sira ne'ebé ladún dezenvolvidu, feto hamutuk millaun 300 resin maka uza ona métodu kontrasepsi modernu iha tinan ne'e.

"Marka" ida ne'ebé "demora dékada barak iha área saúde no dezenvolvimentu ne'ebé hetan" no ne'ebé permiti ona, iha de'it tinan ne'e evita inan sira nia mate hamutuk rihun 124 (liu rihun 19 iha tinan 2015), evita ona abortu ne'ebé la seguru hamutuk millaun 26 (liu millaun 2,5) no evita ona isin-rua ne'ebé lahó planu hamutuk millaun 82 (liu millaun ualu).

Maski iha aumentu - ohin loron iha feto hamutuk millaun 30 resin duké iha tinan 2012, iha nasaun 69 ne'ebé ho asesu ba métodu modernu sira kontrasepsi nian - relatóriu haree katak presiza nafatin esforsu internasional maka'as ho to'o objetivu ikus ba millaun 120 to'o tinan 2020.

Iha nível rejional, ba dala uluk maka 30% resin hosi feto sira iha nasaun sira leste no súl Áfrika nian uza ona métodu kontrasepsi, iha Áfrika Osidental uzu ne'e aumenta ba feto hamutuk millaun ida resin entre tinan 2011 no 2015.

Beth Schlachter, diretora ezekutivu hosi FP2020, subliña ona katak maski seidauk bele to'o ba feto tomak ne'ebé hakarak ka presiza kontrasepsi, ohin loron bele "iha informasaun detalladu sira kona-ba nasaun ida-idak" no hatene di'ak liu oinsá bele atua.

Estudu subliña liuliu katak sei iha falta finansiamentu ba programa sira planeamentu família nian, material inklui prezervativu sira no métodu distribuisaun sira ne'ebé adekuadu no sufisiente.

"Ho kompromisu ne'ebé renovadu ami iha oportunidade no obrigasaun hodi to'o iha fatin sira ne'ebé susar tebes hodi to'o, inklui joven sira, sira ne'ebé kiak liu, sira ne'ebé marjinalizadu liu no fraku liu, hodi garanti atu programa no polítika sira ho baze iha prinsípiu apoiu, asesu, disponibilidade no kualidade asisténsia nian", hatete hosi Schlachter.

ho Lusa

komentáriu sira