moris di'ak

Lansamentu hosi programa Liga Inan iha munisípiu Ermera

SAPO TL, 17 de marsu de 2016

Ministériu Saúde ho parseiru dezenvolvimentu Health Alliance International (HAI) no Catalpa International lansa programa Liga Inan iha munisípiu hothotu. No lansa tan programa refere ba iha munisípiu Ermera, loron 10-marsu liu ba.

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Liga Inan hanesan programa saúde dahuluk iha Timor-Leste, hodi lori inan isin-rua sira hakbesik-aan liu tan ba ho pesoál saúde. Programa Liga Inan hala’o ho objetivu atu hasa’e moris ba saúde feto sira-nian durante isin rua nomós partus, liu husi konesaun entre inan isin rua ho pesoál saúde sira no atu hamenus númeru mortalidade no morbilidade ba inan ho bebé.

Programa ne’e, hala’o liu hosi mensajen saúde ba inan isin-rua sira, dala rua iha kada semana no fasilita kontaktu entre inan ho sira-ninia parteira, liu husi kontaktu telefone regulár durante tempu atu partus.

Tuir diretór ezekutivu Catalpa International, Anders Hofstee, hanesan organizasaun nonprofit ba dezeñu no inovasaun, distánsia no menus informasaun hanesan obstáklu boot ba iha área rurál hothotu, inklui mos Ermera, liu-liu ba inan sira hodi bele asesu ba serbisu saúde.Nia mos hatutan tan katak programa Liga Inan la’os teknolojia, maibé nu’udar instrumentu ida ba parteira nomós doutór sira atu ajuda inan hothotu no fó apoiu ba sira, bainhira presija. 

Iha parte seluk, diretór hosi organizasaun ne’ebé kombina entre servisu étiku no solidariedade, Country HAI, Che Katz baze iha Timor-Leste, fó sai katak bainhira fasilita inan sira ho parteira liu hosi komunikasaun, maka bele hametin fi’ar ba iha sistema saúde nian no inan sira mos bele fi’ar-aan hodi hato’o pergunta no husu ajuda, bainhira sira presija.  

Programa ne’e hetan suporta hosi Ajénsia Dezenvolvimentu Internasionál Estadus Unidus Amérika, hosi Governu Austrália nomós Timor Telecom. Lansamentu dahuluk ba programa ne’e iha fulan marsu-2013, no hahú iha munisípiu Manufahi.

Tuir estimasaun kada tinan, Ermera iha inan isin rua hamutuk 5.800, no programa Liga Inan atu atinji inan isin rua hamutuk 2,900 ba tinan primeiru.

“Governu iha kompromisu atu hadi’ak saúde inan no oan iha Timor-Leste.Ministériu Saúde implementa programa Liga Inan hanesan dalan ida mos hodi ajuda serbisu saúde ba inan no kosok-oan ne’ebé foin moris, liu hosi haforsa ligasaun entre pesoál saúde ho inan isin-rua sira. Haktuir rezultadu programa Liga Inan iha munisípiu seluk. Tanba ne’e maka ami hein katak ho kobertura indikadór xave ba inan no oan bele aumenta liu tan no serbisu saúde husi pesoál saúde, ba inan isin-rua no sira-nia kosok-oan, nomós fó benefísiu tuir saida maka sira merese atu hetan”, tenik Xefe departamento Saúde Maternu-Infantil, Triana do Rosário Corte-Real de Oliveira.

Programa ne’e rejista ona inan 7.500 resin hosi munisípiu haat.

Atu hatene estatístika kona-ba númeru hosi inan isin-rua sira ne’ebé halo rejistu, inklui númeru bebé nian bele klika iha www.ligainan.org.

Durante lansamentu ba programa refere iha Ermera konta ho partisipasaun hosi xefe Departamentu Saúde Matrenu-Infantil, Triana do Rosario Corte-Real de Oliveira, adjuntu ba Serbisu Saúde Munisípiu Ermera, Graçiano C. Da Cruz, adjuntu administradór munisípiu Ermera no hanesan mos diretór Sosiál no Solidariedade munisípiu Ermera, funsionáriu ministériu saúde nian no ho parseiru hothotu.

SAPO TL ho Ministério de Saúde

komentáriu sira