moris di'ak

Iha aldeia italianu ne'e bele moris iha tinan 100 resin no siénsia deskobre nia segredu

SAPO TL, 06 de setembru de 2016

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Sentenáriu sira, barak tebes liuliu iha rejiaun ida besik Salerno, iha súl Itália nian, fó sai ona iha loron-segunda ne'e segredu balun hodi moris iha tinan barak nia laran: kuaze laiha markadór ida iha raan iha nia organizmu, la hanesan ho ema sira seluk.

Ho ema na'in 81 ne'ebé iha tinan 100 resin iha inísiu fulan-Setembru, hosi populasaun hamutuk na'in 700, Acciaroli hamosu kuriozidade hosi grupu ida sientista amerikanu nian, ne'ebé iha fulan barak nia laran ba iha rejiaun Cilento, situa entre tasi no foho iha súl Salerno, iha Campania, hodi deskobre segredu hosi moris naruk ne'ebé esepsional.

Investigadór sira hosi Universidade San Diego, iha Califórnia, ne'ebé hetan tulun hosi kolega sira hosi Universidade La Sapienza, hosi Roma, to'o ona durante primavera liubá hodi estuda mistériu hosi populasaun lokal sira ne'ebé dezafia mate, no iha loron-segunda ne'e fó sai ona rezultadu dahuluk sira hosi estudu ne'e.

Tendénsia hosi sentenáriu sira ne'e ladún hetan moras fuan sira nian ka moras kognitivu sira, hanesan Alzheimer, tanba iha markadór biolójiku ida ne'ebé ladún mosu iha sira nia organizmu. Hanesan vazodilatadór ida ne'ebé nia naran mikrosirkulasaun, haktuir hosi komunikadu ida hosi grupu investigadór sira ne'e.

Markadór raan nian prezente "ho númeru ne'ebé ki'ik tebes iha ema sira ne'ebé sira estuda, no karik atua hanesan fatór poderozu ida protesaun nian, hodi favorese dezenvolvimentu di'ak ida hosi mikrosirkulasaun nian", ka, sirkulasaun raan kapilar nian, haktuir hosi testu.

Estudu fó sai mós "metabolitu sira (molékula ki'ik sira) ne'ebé prezente iha sira nia organizmu, ne'ebé bele influensia ho di'ak ba moris naruk no iha moris di'ak hosi ema sira ne'ebé iha tinan 100 resin iha Cilento", hatutan hosi komunidade maibé la espesifika molékula ne'e.

Sientista sira desidi hanaruk estudu pilotu ne'e no dezenvolve nia investigasaun, hala'o mós kontrolu fuan no neurolójiku sira, esplika hosi profesór medisina kardiovaskular hosi universidade San Diego, Alan S. Maisel, ba AFP.

Investigadór sira iha interese maka'as ba ema sira ne'e nia alimentasaun, dieta mediteráneu ne'ebé koñesidu tebes, ho baze iha azeite, ne'ebé sira rasik halo maibé mós iha jenétiku.

Ema sira ne'ebé iha tinan atus resin bele iha gen ida ne'ebé bele hasai propriedade benefíku sira hosi produtu balun ne'ebé konsumidu regularmente hanesan "alekrim, ne'ebé hadi'a kapasidade kakutak nian", hatete hosi profesor Maisel.

Entre ema katuas-ferik na'in 80 ne'ebé partisipa ona iha estudu, na'in 25 iha tinan 100 resin, laiha ema ida maka iha moras Alzheimer. Sira hotu, loron-loron, halo atividade fíziku ida hanesan kail ikan, manutensaun ba sira nia jardin ka la'o, iha povoadu ida ne'ebé iha estrada sira susar tebes hodi la'o. "Ema sira ne'e barak liu mantén atividade seksual ida", fó sai mós hosi investigadór.

Fonte: SAPO Lifestyle

komentáriu sira