moris di'ak

Feto indiana rihun resin hasai úteru hodi nune'e menstruasaun la impede serbisu

SAPO TL, 05 de jullu de 2019

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Feto joven rihun resin iha Índia hasai úteru iha tinan tolu ikus ne'e hodi laiha menstruasaun no bele serbisu ko'a tohu iha kampu sira ne'ebé laiha hariis-fatin no falta ruma hetan kastigu.

Foku rua hosi notísia rejional sira ne'ebé haktuir hosi BBC iha loron-kinta ne'e hatudu katak Índia, nasaun ne'ebé konsidera katak feto sira sai hanesan foer bainhira iha menstruasaun, kontinua iha relasaun ida ne'ebé problemátiku tebes ho menstruasaun.

Ida dahuluk iha orijen iha estadu Maharashtra, ho imprensa indianu fó sai katak joven-feto rihun resin sujeita ba prosedimentu sirúrjiku sira hodi hasai sira nia úteru iha tinan tolu ikus ne'e.

Númeru substansial ida hosi kazu sira ne'e iha motivasaun ba posibilidade hodi serbisu iha kolleita sira no ko'a tohu sira, refere hosi jornal sira ne'ebé haktuir hosi estasaun britániku.

Tinan-tinan, família kiak sira hamutuk millaun resin hosi distritu Beed, Osmanabad, Sangli ho Solapur emigra ba zona sira ne'ebé koñesidu hanesan "dalan masin-midar nian" hodi serbisu fulan ne'e hodi ko'a tohu.

Iha ne'ebá, família sira ne'e hetan kontrolu hosi empreiteiru sira, baibain sira ne'ebé persisti hodi kontrata feto sira, tanba serbisu ne'e hanesan todan no feto sira bele iha falta loron ida ka loron rua durante sira nia períudu.

Bainhira fala serbisu loron ida, tenki selu penalizasaun ida.

Serbisu sira ne'e hanesan laiha kondisaun di'ak sira tanba família sira tenki hela iha kaban sira ka tenda sira besik kampu sira, laiha hariis-fatin, no tanba ko'a tohu dalabarak akontese iha kalan, laiha oras hodi toba ka hadeer.

Bainhira feto sira iha menstruasaun buat hotu sai susar liután.

Aleinde ne'e, feto barak hetan infesaun sira tanba kondisaun hijiéniku sira laiha ka kuaze laiha no, tuir ativista sira ne'ebé serbisu iha rejiaun ne'e, médiku barak fó korajen ba sira hodi hasai úteru maski sira iha de'it problema jinekolójiku ki'ik sira ne'ebé hanesan fásil trata ho ai-moruk.

Ho maioria hosi feto sira hosi zona sira ne'e kaben sedu, barak iha ona oan na'in rua ka na'in tolu bainhira iha tinan 20 resin, no tanba médiku sira la aviza sira kona-ba problema sira ne'ebé sira hasoru bainhira sujeita ba histerotomia sira, sira fiar katak laiha problema ruma bainhira hasai úteru.

Buat sira ne'e hotu muda ona aldeia oioin hosi rejiaun ba "aldeia sira ho feto sira ne'ebé laiha úteru".

Kestaun ne'e ko'alia ona iha fulan liubá iha asembleia nasional hosi deputadu Neelam Gorhe, no ministru Saúde hosi Maharashtra, Eknath Shinde, admiti ona katak rejista ona histerotomia hamutuk 4.605 iha de'it distritu Beed dezde tinan 2016.

Tuir subliña hosi ministru rejional, maski la'ós sirurjia tomak halo ba feto sira ne'ebé serbisu iha kampu tohu sira nian, governu kria ona komité ida hodi investiga kazu oioin.

Foku daruak hosi notísia rejiona sira refere ba estadu Tamil Nadu no kona-ba feto sira ne'ebé serbisu iha indústria multimilionáriu ba ropa sira.

Iha inkéritu ne'ebé halo hosi Fundasaun Thomson Reuters ba feto na'in 100, sira hotu hatete katak simu ai-moruk ida ne'ebé fó hosi sira nia patraun bainhira sira kesar kona-ba moras menstruasaun nian maski lei hatete katak iha loron ida ba folga.

Sira adianta katak ai-moruk sira ladún fornese hosi médiku sira no barak admiti katak la hatene naran hosi ai-moruk ne'ebé maka sira hemu no la hatene sira nia efeitu sekundáriu.

Kostureira sira, ne'ebé barak hosi nia totalidade mai hosi família kiak sira hosi rejiaun, konsidera katak ai-moruk sira ne'e hamosu problema saúde ba sira - dezde depresaun to'o krizi ansiedade nian, iha infesaun urináriu no abortu sira - maibé sira hatete katak labele lakon saláriu loron ida nian tanba moras menstruasaun nian.

Hasoru alerta sira ne'e, Komisaun hosi Índia ba Feto sira hatete kona-ba kondisaun sira iha Maharashtra hanesan "triste ho mizerável" no apela ona ba Governu nasional hodi foti medida sira ne'ebé previni "atrosidade sira hanesan ne'e".

Governu promete mós monitoriza saúde hosi feto serbisu na'in sira iha indústria vestuáriu nian iha Tamil Nadu.

Relatóriu sira mosu iha momentu ne'ebé, iha mundu tomak, foti ona polítika sira hosi igualdade jéneru nian, hodi fasilita asesu ho kondisaun sira hosi feto sira nian iha serbisu.

Iha Índia, prezensa hosi feto sira iha merkadu serbisu nian tuun hosi 36% iha tinan 2005-2006, ba 25,8% iha tinan 2015-2016.

Fonte: Ajénsia Lusa

komentáriu sira