moris di'ak

Adolesente sira iha tratamentu HIV iha Áfrika-Súl aumenta maka'as dezde 2010

SAPO TL, 02 de outubru de 2019

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Númeru hosi adolesente sira ho tinan entre 15 to'o 19 ne'ebé simu hela tratamentu tanba infesaun vírus HIV iha Áfrika-Súl aumenta dala sanulu dezde tinan 2010, haktuir hosi estudu ida ne'ebé fó sai iha loron-tersa ne'e hosi jornal Lancet HIV.

Estudu, ne'ebé foti informasaun hosi labarik sira ho joven sira hamutuk rihun 700 resin ho tinan entre 1-19 ne'ebé halo tratamentu ba infesaun ho vírus imunodeficiéncia humana (VIH) iha nasaun ne'e, aprezenta taxa sira hosi inisiasaun ba tratamentu antiretroviral entre joven sira ho faixa tinan ne'e (15-19) no destaka nesesidade urjente hodi hadi'a serbisu sira ba kuidadu sira saúde ne'e nian ba ema adolesente sira ne'ebé iha vírus ne'e.

Maski hosi aumentu ba númeru hosi joven sira ne'ebé simu tratamentu, menus 50% hosi adolesente sira ne'ebé aprezenta ba tratamentu hahú ho susesu ba terapia antiretroviral (TARV), reporta hosi The Lancet HIV, tanba razaun sira ne'ebé iha ligasaun ho persisténsia hosi "susar sira ne'ebé impede adolesente barak hodi hahú tratamentu", haktuir hosi autora prinsipal hosi estudu.

Susar sira ne'e "bele inklui preokupasaun sira kona-ba estigam, persepsaun ida hosi falta konfidensialidade iha klínika sira, nesesidade hosi vizita beibeik ba klínika sira hodi hahú no mantén tratamentu no aumentu hosi responsabilidade sira iha uma, liuliu entre órfaun sira HIV nian", hatete hosi Mhairi Maskew, investigadora hosi Universidade Witwatersrand, Áfrika-Súl nian.

"Hatán ba aumentu lalais hosi adolesente sira ne'ebé buka kuidadu saúde nian relasionadu ho HIV, sistema saúde sira tenki determina dalan ne'ebé di'ak hodi satisfaz nesesidade sira hosi populasaun krítika ne'e, tanba aumentu hosi teste sira no tratamentu sira bele sai krítiku hodi kontrola epidemia", alerta hosi autora.

Áfrika-Súl iha númeru aas hosi ema sira ne'ebé infestadu ho HIV iha mundu tomak, ho ema infetadu besik millaun 7,2. Labarik barak maka moris ho vírus, maibé sobrevive iha adolesénsia lahó tratamentu, no adolesente sira hetan mós infesaun liuhosi transmisaun seksual. Labarik-feto adolesente sira iha posibilidade boot iha HIV hosi grupu demokgráfiku ruma iha nasaun, ne'ebé atribui ba desigualdade jéneru ho violénsia seksual.

Aumentu hosi númeru adolesente sira iha tratamentu akontese tanba susesu istóriku hosi programa tratamentu antiretroviral (TARV) hosi Áfrika-Súl. Labarik sira ne'ebé infetadu ho HIV bainhira sei kosok-oan, antes disponibilidade jeneralizadu hosi prevensaun transmisaun vertikal (PTV) nian, agora moris hela iha tinan adultu ho TARV. Iha parte seluk, adolesente sira hahú ona TARV iha número boot.

Autor sira hosi estudu ne'e analiza ona informasaun hos pasiente hamutuk 730.882 ho tinan entre 1-19 ne'ebé tama ona iha programa nasional HIV nian hosi Áfrika-Súl entre tinan 2005 no 2016. Entre pasiente sira ne'ebé hahú ona tratamentu antes tinan 15, 54% hanesan seksu femininu (pasiente na'in 209.205), ho númeru ida ne'ebé besik hosi labarik-mane sira ho labarik-feto sira ne'ebé infetadu iha faze pré-natal durante partu ka fó susu nian.

Entre pasiente sira ne'ebé hahú ona tratamentu ho tinan entre 15-19 (pasiente na'in 301.242), 88% hanesan seksu femininu, taxa konsistente ida ho nível infesaun ne'ebé aas hosi HIV ne'ebé transmiti liuhosi asaun seksual, nune'e mós ho taxa aas tebes ba feto joven sira ne'ebé maka buka tratamentu bainhira kompara ho mane joven sira.

Entre pasiente sira ne'ebé tama ona iha programa HIV durante períudu estudu nian, 57% (na'in 415.882 hosi 730.882) hahú ona simu terapia antiretroviral no númeru total hosi pasiente sira iha tratamentu aumenta ona ba faixa etária ida-idak.

Númeru hosi labarik sira ho tinan entre 1-4 ne'ebé hahú ona tratamentu aumenta ona iha 25%, hosi na'in 25.803 entre tinan 2005 no 2008 ba na'in 32.456 durante tinan 2013 to'o 2016. Iha períudu hanesan, númeru hosi joven sira entre tinan 15-19 ne'ebé hahú ona tratamentu aumenta ona hosi pasiente na'in 7,949 iha tinan 2005 to'o 2008 ba na'in 80.918 durante tinan 2013 to'o 2016, aumenta dala sanulu iha númeru hosi adolesente sira iha terapia antiretroviral nian.

Maski iha númeru sira ne'e, pasiente sira ne'ebé infetadu ne'ebé tama ona iha tratamentu hanesan adolesente sira iha taxa ne'ebé ki'ik tebes hosi inísiu terapia antiretroviral nian duké labarik ki'ik sira. Iha de'it 45% hosi adolesente sira ho tinan entre 15-19 no 42% hosi labarik-mane sira entre tinan ne'e hahú ona tratamentu, taxa ne'ebé kompara ho 68% hosi labarik-ki'ik mane ho tinan entre 1-4.

Iha komentáriu ida ba estudu ne'e, Audrey Pettifor, hosi Universidade Carolina-Norte, iha Estadus Unidus, subliña ona iha deklarasaun sira ba The Lancet HIV katak Maskew ho nia kolega sira hatudu katak "luta kontra HIV seidauk hotu no atu Governu súl-afrikanu, doador sira, programa sira ho investigador sira tenki atua ho urjénsia hodi dezenvolve, testa ho implementa intervensaun sira ho baze iha evidénsia sira [ne'ebé hetan hosi investigasaun sira hanesan ne'e] hodi preve infesaun foun sira ho hadi'a ligasaun hosi adolesente sira ba programa sira kuidadu saúde nian no nia retensaun".

Fonte: Ajénsia Lusa

komentáriu sira