lifestyle

Poeta ho ensaísta kubanu Roberto Fernández Retamar mate ho tinan 89

SAPO TL, 22 de jullu de 2019

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Poeta ho ensaísta kubanu Roberto Fernández Retamar, Prémiu Nasional Literatura nian ho prezidente hosi Casa das Américas ne'ebé koñesidu, mate ona iha loron-sábadu ne'e iha Havana, ho tinan 89.

"Ami lakon ona poeta ho pensador boot ida hosi Ami nia Amérika no hosi mundu: Roberto Fernández Retamar. Nia husik mai ita serbisu esepsional ida, foka iha deskolonizasaun no anti-imperializmu", hakerek hosi eis-ministru Kultura hosi illa ne'e, Abel Prieto, iha rede sosial Twitter.

Jornalista, poeta, ensaísta, profesor universitáriu ho diplomata, Fernández Retamar (1930-2019) hahú serbisu sedu tebes nu'udar jornalista iha revista "Alba", ne'ebé nia entrevista ona vensedor hosi Prémiu Nobel Literatura norte-amerikanu Ernest Hemingway.

Iha dékada 1950 nia kolabora ona ho revista emblemátiku "Origens" ho envolve ona iha luta klandestinu hasoru rejimi Fulgencio Batista.

Hafoin triunfu hosi revolusaun ne'ebé lidera hosi Fidel Castro iha tinan 1959, nia okupa ona kargu oioin iha instituisaun kultural sira, inklui iha Casa das Américas, ne'ebé nia diriji ona ba dala uluk revista hosi instituisaun dezde tinan 1965 no asumi ona prezidénsia hosi tinan 1986 to'o ohin loron.

Fernández Retamar harii ho edita mós to'o tinan 1964 revista "Unión" hamutuk ho naran intelektual sira Nicolás Guillén, Alejo Carpentier ho José Rodríguez Feo.

Sai nu'udar membru hosi Akademia Kubanu Lian nian, ne'ebé nia diriji entre tinan 2008 no 2012, no membru korespondente hosi Real Akademia Española.

Autor hosi obra oioin iha proza ho versu, nia livru sira tradús ona ba lian sanulu resin no nia ensaiu "Caliban: Apuntes sobre la cultura en nuestra America" (1971) konsidera hanesan ensaiu ida importante liu hosi literatura latino-amerikanu hosi sékulu XX.

Fernández Retamar uluk hanesan membru hosi Konsellu Kubanu Estadu nian - órgaun importante tebes hosi Governu iha nasaun ne'e - no deputadu iha Asembleia Nasional entre 1998 ho 2013.

Iha 1989 hetan ona prémiu ho Prémiu Nasional Literatura, prémiu importante liu iha illa ne'e, no hafoin ne'e Prémiu Nasional hosi Siénsia Nasional iha tinan 2012 no Prémiu Internasional José Martí UNESCO nian iha fulan-Janeiru liubá, entre distinsaun sira seluk.

Fonte: Ajénsia Lusa

komentáriu sira