lifestyle

ONG kritika adopsaun ne'ebé kantora norte-amerikanu Madonna halo ba labarik kaduak hosi Malaui

SAPO TL, 08 de fevereiru de 2017

  • Madonna (Foto@ Franck Robichon /EPA)

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Adopsaun hosi labarik kaduak hosi Malaui ne'ebé halo hosi kantora Madonna hamosu krítika barak hosi organizasaun la'ós governamental oioin hosi nasaun afrikanu ne'e, nasaun ne'ebé kantora norte-amerikanu halo ona adopsaun ba labarik na'in rua seluk, haktuir hosi ajénsia notísia franseza AFP.

Iha loron-tersa, tribunal Lilongwe nia fó lisensa atu kantora halo adopsaun ba kaduak rua ho tinan haat, Esther ho Stella, hosi orfanatu ida iha Mchinji, iha sentru-oeste nasaun nian, besik iha fronteira ho Zámbia.

"Nia tenki iha abordajen ida oinseluk, ajuda família kiak sira ho labarik sira no la'ós halo adopsaun", hatete hosi Maxwell Matewere, diretór hosi organizasaun la'ós governamental (ONG) "Olhos para as Crianças", ba AFP.

"Família barak hakarak kria sira nia oan iha uma bainhira iha apoiu finanseiru", nia hatutan.

Ba Ken Mhango, diretor iha Malaui hosi Rede Afrikanu ba Protesaun no Prevensaun Abuzu Infantil nian (ANPPCAN), katak kantora hatudu "impresaun katak iha Malaui iha merkadu ida labarik kiak sira nian ne'ebé prontu atu hetan adopsaun".

Tuir desizaun hosi justisa, ne'ebé AFP konsulta iha loron-kuarta ne'e, Madonna senti "obrigasaun" hodi halo adopsaun ba labarik kaduak na'in rua ne'e.

Tuir juíza Fiona Mwale, ne'ebé fó lisensa adopsaun ne'e, Madonna nia serbisu iha orfanatu sira halo nia senti "obrigasaun hodi prenxe mamuk ne'ebé maka labarik sira senti iha moris" no "loke nia uma".

Madonna halo tiha ona adopsaun ba labarik-mane ida, David Banda, iha tinan 2006, iha orfanatu hanesan iha Mchinji, no liutiha tinan tolu nia adopta ona labarik-feto ida, Mercy James.

Iha tinan 2006, kantora norte-amerikanu harii ona fundasaun Raising Malawi, hodi haree liuliu ba órfaun sira hosi nasaun ne'e no sei harii mós ospital sira.

ho Lusa

komentáriu sira