lifestyle

Livru hosi koziñeiru portugés hakarak promove "gastronomia loloos" Timor nian

SAPO TL, 06 de juñu de 2018

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Rekupera reseita ho sabor loloos sira hosi Timor-Leste hanesan dezafiu hosi koziñeiru portugés Luís Simões, ne'ebé hakarak kontribui hodi "kria gastronomia timoroan ida ne'ebé loloos" ho livru "Sabor de Timor", ne'ebé sei lansa iha loron-kuarta ne'e iha Lisboa.

Serbisu durante tinan lima iha Timor-Leste, Luís Simões hatete katak koziña loron-loron timoroan nian hetan influénsia hosi hahán indonéziu ho portugeza nian.

Iha livru “Sabor de Timor – Um Tributo à Cozinha de Timor-Leste”, hakerek iha lian portugés ho tétun, ‘chef’ buka ona "fila ba abut sira, kria ka halo fali hahán ne'ebé konstitui aposta ida iha valorizasaun hosi baze sira ka orijen sira hosi kultura gastronómiku ne'ebé iha abut hosi interior Timor-Leste nian, liuhosi utilizasaun ne'ebé maka iha liu pezu (no dalabarak hanesan exkluzivu) hosi produtu sira ho ingrediente lokal sira", refere iha introdusaun.

"Hanesan hakat boot ida hodi kria gastronomia timoroan ida loloos, ho baze iha ingrediente sira no ho sabor Timor nian", hatete hosi Luís Simões ba Lusa.

Hanesan ezemplu hosi produtu sira ne'e maka nuu, uza iha bolu ka hahán salgadu sira, ho nuu-been, mina-nuu ka nuu-uut, maibé mós ai-lia; kafé Timor, "hemun ida ne'ebé maka ema hemu no apresiadu tebes" iha nasaun ne'e; derok, hudi, "iha nia variedade oioin", no ai-manas.

La'ós halo de'it rekolla hosi reseita tradisional sira, Luís Simões buka uza "pasadu ho tradisaun" hanesan "referénsia hodi kria fali, inventa fali no deskobre kombinasaun foun no improvável sira hosi kór, morin no sabor sira ne'ebé hatudu ba mundu imajen hosi povu ida ne'ebé hatene no respeita heransa kultural no gastronómiku hosi sira nia bei'ala sira maibé mós iha valor sufisiente hodi esperimenta no inova, iha mundu ida ne'ebé nakonu ho novidade no deskoberta sira".

Livru hatudu reseita sira hosi hahán ho na'an, ikan, modo-tahan ho sobremeza sira, la haluha mós sumu sira no xá malirin, ne'ebé "ajuda viajante sira ne'ebé laiha prevensaun hodi bele goza ba rai-manas maka'as, ho dalan haksolok, hosi buat barak ne'ebé maka Timor-Leste iha hodi oferese ba sé maka vizita".

‘Chef’ hakarak promove alimentasaun ida saudável liu, knaar ida ne'ebé nia iha mós empeñu iha programa kulináriu "Sabor a Timor", ne'ebé aprezenta dezde tinan 2017 iha estasaun televizaun privadu dahuluk iha Timor-Leste, GMN Tv.

Preokupasaun sira ne'ebé prezenta iha reseita sira ne'ebé Luís Simões prepara ona hakarak halo kontra rekursu sistemátiku ba hahán sona sira hanesan dalan hodi tein, rekuza uza beibeik intensifikador sira ba hahán, hanesan "masako", ne'ebé maka iha nafatin prezensa iha hahán timoroan nian no hamenus konsumu maka'as hosi masin-midar no adosante sira.

Livru iha mós prefásiu ida hosi Xanana Gusmão, antigu Prezidente ho primeiru-ministru Timor-Leste nian, ne'ebé alerta ba nesesidade hodi labele lakon hahán bei'ala sira nian.

"Durante sékulu barak nia laran, gastronomia iha teritória ajusta mós ba sirkunstánsia natural sira, ba influénsia estranjeiru sira, ba difikuldade sosial...Maski nune'e, iha mata-dalan ida ne'ebé permiti mai ita, hosi dook, rona reseita no preseitu antigu sira nia lian murmura (… ) Kondisaun rural no bei'ala hosi ita nia komunidade barak permiti ona atu tradisaun sira ne'e to'o mai ita lahó mudansa barak", afirma hosi Xanana Gusmão.

Líder istóriku timoroan aviza: "Tanba ne'e, laiha tempu atu lakon. Iha tempu foun hanesan ne'e, ne'ebé komunikasaun ho sirkulasaun hahú halo hasoru velosidade hosi kultura sira ne'ebé urbanu liu, iha risku objetivu ida katak rikusoin kultural hanesan ne'e bele lakon, tanba falta prátika, partilla, tanba lakon kontemplasaun antigu ne'ebé permiti apresia no valoriza koziña kleur no apuradu hosi avó sira".

"Povu tomak iha sira nia tradisaun gastronómiku sira no Timor-Leste, klaru, la'ós hanesan esepsaun. Dezde sempre maka família sira halibur hamutuk iha ahi-matan, ne'ebé prepara hahán balun hodi fahe ba ema tomak", nia refere.

No, iha Timor-Leste, "etu to'o nafatin ba ema ruma", tanba "laiha povu barak maka hanesan jenerozu hanesan povu Timor-Leste nian bainhira to'o oras han nian", Xanana Gusmão garanti.

Ne'e hanesan obra daruak hosi Luís Simões, ho tinan 28, ne'ebé iha tinan rua liubá lansa ona “Sabores da Lusofonia”.

Livru “Sabor de Timor” aprezenta iha loron-kuarta ne'e, iha Lisboa, iha Camões – Instituto da Cooperação e da Língua, no sei iha aprezentasaun sira iha Praia de Mira, ne'ebé hanesan autor nia rai moris fatin, iha loron 08 Juñu; iha Porto, iha Asosiasaun Tane Timor, iha loron 10; iha Eskola Hotelaria Coimbra nian, iha loron 11 no iha Biblioteka Ponte de Vagos, iha loron 12.

Lansamentu iha Timor karik sei halo iha inísiu fulan-Jullu.

Fonte: Ajénsia Lusa

komentáriu sira