lifestyle

Leonardo da Vinci nia kuadru fa'an ho rekord 380 ME iha leilaun

SAPO TL, 16 de novembru de 2017

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Leonardo da Vinci nia kuadru ida, ne'ebé hatudu Kristu kaer blogu kristal ida, fa'an ona ho folin rekord ida hamutuk dolar millaun 450 (euro millaun 380) iha leilaun ne'ebé halo iha loron-kuarta, halakon rekord anterior.

Kuadru, ho naran "Salvator Mundi" ka "Salvador Mundu nian", hanesan kuadru ida hosi kuadru 20 Leonardo da Vinci nian ne'ebé maka ezisti no hanesan úniku iha ema privadu nia liman. Fa'an hosi leiloeira Christie’s ne'ebé la identifika ema ida ne'ebé sosa.

Folin ne'ebé aas liu ne'ebé maka uza hodi sosa sasán arte ida nian iha leilaun maka ho folin dolar millaun 179,4 (euro millaun 152), hodi sosa kuadru hosi Pablo Picasso "Women of Algiers (Version O)" iha fulan-Maiu 2015, iha mós Christie’s, iha Nova Iorke. Folin aas liu ne'ebé maka selu ba sasán arte ruma maka millaun 300 ne'ebé maka sosa hosi ema partikular sira iha fulan-Setembru 2015 hosi Fundasaun David Geffen ba jestor hosi fundu ida Kenneth C. Griffin.

Pintura ho sentímetru 66 iha data besik tinan 1500 no hatudu Kristu hatais ropa ho estilu renasentista, ho liman-loos foti halo bénsaun no liman-karuk iha kraik hodi kaer bola kristal ida.

"Salvador Mundi" perte uluk ba liurai-mane Carlos I hosi Inglatera iha tinan 1600 nia klaran no fó ba leilaun hosi duke Buckingham nia oan-mane iha tinan 1763.

Hafoin ne'e, kuadru ne'e lakon no hetan fali iha tinan 1900, tempu ne'ebé maka mosu no sosa hosi kolesionador britániku ida.

Iha époka ne'e, nia hanoin katak hanesan obra hosi Leonardo nia alunu, no la'ós hosi mestre rasik.

Pintura ne'e fa'an fali iha tinan 1958 no hafoin ne'e sosa fali iha tinan 2005, hetan estraga maka'as no karik pinta oituan hosi konsórsiu ida hosi komersiante sira arte nian ne'ebé selu ho folin la to'o dolar rihun 10.

Komersiante sira ne'e hadi'a pintura tomak no dokumenta nia autentisidade hanesan obra hosi Leonardo da Vinci.

ho Lusa

komentáriu sira