lifestyle

FBI fó fali ba família judia pintura ne'ebé naok hosi nazi iha tinan 75 liubá iha Fransa

SAPO TL, 02 de abril de 2019

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Iha loron-segunda ne'e, FBI fó fali pintura ida hosi holandés Salomon Koninck ba nia proprietáriu legal sira, família franseza judia ida, hafoin iha tinan 75 liubá naok hosi nazi sira iha Fransa iha Funu Mundial Daruak.

Pesa, "Filózofu ida ne'ebé afia hela nia kaneta", pinta hosi Koninck iha tinan 1639, entrega ona ba família Schloss, iha serimónia ida ne'ebé halo iha konsuladu fransés iha Nova Iorke, Estadus Unidus, ho prezensa hosi ministru Negósiu Estranjeiru hosi nasaun europeu ne'e, Jean-Yves Drian.

"Naok iha ami nia teritóriu hosi Gestapo no lori ba Munike ho kumplisidade hosi kolaborador fransés sira, iha tinan 1943, no lakon hahú hosi tempu ne'ebá", esplika hosi Drian, ne'ebé maka akompaña hosi prokurador hosi distritu súl Nova Iorke nian, Geoffrey Berman, ho reprezentante ida hosi gabinete investigasaun kriminal hosi FBI nian iha Washington, Michael Driscoll.

"Ikusmai hasoru malu fali ho nia na'in sira, herdeiru sira hosi Adolphe Schloss [kolesionador ida hosi arte franseza] no nia oan-mane na'in lima", hatutan hosi ministru.

Prezente mós iha serimónia Schloss nia bisnetu sira, Laurent ho Michel Vernay, nune'e mós nia feto-foun, Eliane Demartini, ne'ebé deskreve regresu hosi pintura ne'e hanesan "vitória ki'ik" ida no fó hanoin mós katak iha pesa arte barak maka ema naok no seidauk hetan.

Governante fransés destaka ona katak nia nasaun halo esforsu sira hodi aselera identifikasaun no restituisaun hosi obra sira ne'ebé maka naok durante rejimi Hitler nian, no observa ona katak 2/3 hosi pesa hamutuk 100.000 ne'ebé naok hosi nazi sira hetan kedas bainhira konflitu ne'e hotu.

"Filózofu ida ne'ebé afia hela nia kaneta" hetan iha tinan 2017 bainhira nia proprietáriu, xilenu Renate Stein, kontakta uma leilaun Christie hodi fa'an iha Nova Iorke, hafoin nia família sosa tiha iha Alemaña iha tinan 1950.

Drian mós destaka kona-ba aumentu atual hosi anti-semitizmu no hatete kona-ba esforsu hosi nia Governu hodi kombate, fó sai falta asaun nian hosi parte Estadus Unidus nian.

"Asaun ne'ebé hanesan ne'ebé tenki halo iha teritóriu norte-amerikanu, ne'ebé iha nostaljia barak hosi nazismu subar iha Emenda Dahuluk nia kotuk hodi hamosu propaganda ódiu nian", nia hatete.

Prokurador hosi distritu súl Nova Iorke nian observa ona katak saida maka akontese ho naok hosi obra sira arte nian ne'ebé iha ona ema judeu sira nia liman durante Funu Mundial Daruak "la'ós de'it hanesan injustu maibé dezumanu".

"Ita iha imperativu moral ida hodi halo asaun, ne'ebé maka ami halo daudaun no ami sei halo nafatin", nia hatutan.

Reprezentante hosi FBI esplika ona investigasaun maka'as ne'ebé maka tenki halo iha kazu sira hanesan ne'e hodi hatudu orijen hosi pesa sira, no destaka importánsia maka'as hosi kolaborasaun hosi uma leilaun sira hodi identifika no halo komunikasaun ba pesa sira ne'ebé maka ema naok.

Fonte: Ajénsia Lusa

komentáriu sira