lifestyle

Bilionáriu fransés oferese euro millaun 100 ba rekonstrusaun hosi Notre-Dame

SAPO TL, 02 de outubru de 2019

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Bilionáriu fransés François Pinault ho nia oan-mane François-Henri Pinault asina ona iha loron-tersa ne'e dokumentu sira ne'ebé rezerva euro millaun 100 ba rekonstrusaun hosi Katedral Notre-Dame, haktuir hosi fonte hosi Arkidioseze Paris nian.

Pinault sira asina ona akordu doasaun nian iha Arkidioseze Paris nian, liutiha fulan barak hosi atrazu ne'ebé halo autoridade franseza sira depende hosi doasaun karidade ki'ik sira hodi selu faze dahuluk reparasaun nian.

Donativu ne'e sei fó ba Fundasaun Notre-Dame impulsu finanseiru ida ne'ebé hein kleur ona, bainhira autoridade sira planeia rekonstrusaun hosi katedral hafoin inséndiu iha loron 15 Abril tinan ne'e.

Arsebispu Paris nian, Michel Aupetir, hatete katak "mundu tomak fó saida maka bele tuir sira nia nesesidade", maibé hatutan katak: "Doador boot sira fó mai ami espasu hodi dada-iis".

François Pinault, ne'ebé grupu internasional luxu Kering iha subsidiáriu hanesan Guvvi ho Saint Laurent, promete ona oferta hafoin kedas inséndiu no hatete katak sei hein fó sai ba públiku nia doasaun hodi motiva ema sira seluk hodi partisipa mós.

Bilionáriu fransés Bernard Arnault, hosi grupu hosi artigu luxu sira LVMH, halo tuir mós ezemplu no promete ona euro millaun 200, hanesan mós Fundasaun Bettencourt Schueller hosi fortuna L'Oreal nian.

Arnault finaliza ona nia kontratu doasaun iha semana liubá.

Apoiu oioin materializa lalais ona iha oras no loron sira hafoin inséndiu.

"Akontese ho dalan espontáneu iha kalan ne'ebá, bainhira ami seidauk hatene katak bele salva katedral ka la'e", hatete hosi Aupetit kona-ba kompromisu hosi família Pinault.

"Nia lansa ona movimentu ida ne'ebé sei hala'o hela, tanba ami sei iha doasaun 140 semana-semana", nia hatutan.

Fundasaun simu ona euro millaun 36 hosi kontribuisaun individual hamutuk 46.000, empreza hamutuk 60 no munisípiu hamutuk 29 entre loron 15 Abril to'o final Setembru nian, haktuir komunikadu ida. Aupetit hatete katak simu ona doasaun ki'ik tebes hanesan euro ida.

Doasaun boot sira, hanesan hosi Pinault sira, sei kleur hodi bele materializa. Bainhira ne'e, funsaun konta liuliu ho doador individual ki'ik sira hosi Fransa ho EUA hodi selu saláriu hosi traballador sira ne'ebé sei serbisu hodi hamoos fatin no kontrola estraga sira ne'ebé mosu tanba inséndiu.

Fonte: Ajénsia Lusa

komentáriu sira