lifestyle

Artista timoroan sira kritika entrega edifísiu projetu Arte Moris nian ba veteranu sira

SAPO TL, 07 de jullu de 2020

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Iha loron-tersa ne'e, artista timoroan sira kritika ona proposta Governu nian hodi entrega ba veteranu sira estrutura ida hosi edifísiu ne'ebé, hahú hosi tinan 2003, serve hanesan 'uma' ba projetu Arte Moris, inisiativa artístika boot dahuluk Timor-Leste nian dezde restaurasaun independénsia nian.

"Ami labele dezisti hosi fatin ne'e. Ami laiha opsaun seluk", hatete ba Lusa hosi Iliwatu Danadere, diretor Arte Moris nian, organizasaun ne'ebé simu artista entre na'in 60 no na'in 70 iha komunidade.

"Ami senti hakfodak ho notísia no ami sei hakarak ko'alia ho Governu ho veteranu sira hodi hatene saida maka akontese", nia refere.

Danadere reaje ba komentáriu sira hosi prezidente Konsellu Kombatente sira hosi Libertasaun Nasional (CCLN), Vidal de Jesus Riak Leman, ne'ebé iha loron-segunda hatete katak informa ona primeiru-ministru kona-ba desizaun hodi entrega edifísiu Arte Moris nian, iha Díli, ba estrutura foun ne'ebé harii iha tinan 2019.

"Ami iha ona garantia hosi primeiru-ministru katak desidi ona atu Konsellu sei serbisu iha Arte Moris iha Komoro", afirma hosi Riak Leman ba jornalista sira.

"Kondisaun sira iha edifísiu hanesan ladi'ak no Konsellu husu ona ba Estadu atu ko'alia ho grupu hodi muda fatin hodi nune'e bele uza hosi Konsellu", nia hatete.

Notísia ne'e hetan krítika maka'as iha rede sosial sira, ho artista oioin ho elementu sira hosi organizasaun sira sosiedade sivil nian kritika falta apoiu ba área arte sira nian no liuliu desizaun kona-ba fatin Arte Moris nian ne'e.

"Presiza diálogu. Laiha ema ida maka ko'alia ho ami. Maibé ami labele lakon fatin ne'e tanba ami laiha fatin seluk", nia refere.

Danadere esplika ona katak agora daudaun Arte Moris envolve artista plástika na'in 32 resin no múziku sira inklui elementu balun hosi grupu muzikal prinsipal sira nasaun nian - hanesan Galaxy ka Klamar - no mós kompañia teatru ki'ik ida.

"Hamutuk entre ema na'in 60 no na'in 70. Ami iha aula loron-loron no maski iha limitasaun ruma tanba COVID-19, ami ativu hela", nia afirma.

"Instalasaun sira iha dependénsia hosi Sekretaria Estadu Arte ho Kultura. Ami tenki hatene nia pozisaun no hosi baze ne'e maka ami sei halo asaun sira seluk", nia esplika.

Hafoin restaurasaun independénsia Timor-Leste nian, iha 2002, Arte Moris reprezenta ona esforsu boot dahuluk hodi tenta halibur artista timoroan sira, kria komunidade ida, eskola arte sira ho sentur kultural ne'ebé maka instala ona iha fatin antigu hosi muzeu indonéziu hosi provínsia ba dala 27 (hanesan Jakarta konsidera uluk Timor-Leste).

Plaka inaugurasaun nian iha tinan 1995 ne'ebé halo iha momentu ne'ebá hosi visi-prezidente indonéziu, Try Sutrisno, ohin loron hanesan tan fatin ida ba instalasaun exterior ida entre instalasaun exterior barak, ne'ebé karreta sira nia restu, mobília sira ka besi tuan sira hanesan kartaun vizita ba sentru ida ne'ebé kompleta ona tinan 17.

Fatin ida ne'ebé hakarak halo liu, kontribui ba rekonstrusaun sosial hosi nasaun ida ne'ebé hasoru dékada barak konflitu nian no hanesan buat hotu limitadu, inklui espresaun artístika.

Artista ida hosi grupu inisial maka Edson Caminha, artista plástiku ho múzika, viola baixo iha Galaxy (grupu ida ne'ebé koñesidu ida iha tinan hirak ikus ne'e).

"Governu tenki rekoñese katak arte halo parte hosi nasaun, katak iha ema barak, joven barak maka envolve iha kriasaun artístika", nia defende ba Lusa.

"No arte kontribui mós ba nasaun, bele kontribui liután ba nasaun. Ha'u la konkorda ho desizaun ida ne'e hosi Governu", nia hatete.

Edson Caminha konsidera katak Gvoernu tenki buka fatin seluk no katak, liuliu, tenki dialoga ho komunidade artístika ne'ebé presiza liután apoiu.

"Ami hanesan komunidade ida no ami sei apoia malu. Kauza iha ne'e la'ós de'it Arte Moris maibé klaru hosi komunidade artístika tomak", nia afirma.

"Artista sira presiza fatin ida, 'uma' ida ne'ebé maka sira bele servisu", nia hatete.

Fonte: Ajénsia Lusa

komentáriu sira