lifestyle

Artezaun sira hosi zona izoladu Atáuro nian aprezenta produtu iha Díli

SAPO TL, 26 de juñu de 2018

  • Foto@ António Cotrim/EPA

fahe
Email
×

Favór ida verifika kampu sira ne'ebé asinaladu

Artigu ne'e fahe ho susesu ho .

Artezaun sira hosi zona balun ne'ebé izoladu liu iha illa Atáuro, iha norte hosi kapital Díli nian, halo estreia iha findesemana ne'e hodi fa'an nia produtu diretamente ba públiku durante feira artezanatu ida.

"Iha artezaun balun ne'ebé konsege fa'an buat hotu", hatete ba Lusa hosi Maria Amado, diretora hosi Empreza Di'ak, ONG timoroan ne'ebé promove ona Feira daruak Artezanatu Ataúro nian iha Díli.

Objetivu hosi feira, ne'ebé ha númeru vizitante maka'as, hakarak dezenvolve no promove área indústria kriativu sira iha Timor-Leste, liuliu iha illa izoladu Ataúro, iha kilómetru 30 hosi norte Díli nian.

Maria Amado esplika ona katak ba ema barak, espozisaun ne'e hanesan oportunidade dahuluk hodi iha interasaun direta ho públiku no hodi hetan valor ba sira nia serbisu.

"Buat ida ne'ebé maka ami serbisu ho grupu sira hosi Ataúro maka tenta fó ba sira asesu ba merkadu. Ema sira iha kapasidade, talentu boot ida, kriatividade maka'as, maibé laiha fatin hodi hatudu saida maka sira halo", nia esplika.

Rezidente iha zona sira ne'ebé izoladu liu iha Ataúro - ne'ebé bele to'o hafoin la'o oras barak nia laran - artezaun sira hetan nune'e limitasaun ba asesu ba merkadu liuhosi loja rua ne'ebé Empreza Di'ak rasik loke, loja ida situa iha kapital timoroan nian.

Fulan-fulan, ekipa sira ONG nian vizita komunidade sira, rekolla produtu sira no aproveita hodi fó formasaun ho kompeténsia sira seluk.

"Ho ne'e maka ami hakarak hatudu Ataúro iha Díli, ba sé maka la vizita illa, no fó oportunidade ba artezaun sira hodi hatudu no fa'an produtu no haree ema sira hodi sosa no valoriza produtu sira ne'ebé sira halo", Maria Amado hatete.

Besik 95% hosi grupu artezaun sira hosi illa - ruanulu - reprezenta ona iha feira hodi fa'an produtu sira bote nian, sasán sira ne'ebé halo hosi rai-mean, ai, sabonete sira ho kreme tradisional sira no mós ai-manas ho ikan-maran.

Hamutuk ho artezaun sira, partisipa mós organizasaun tolu seluk ne'ebé serbisu iha illa, Asosiasaun Home Stays - ne'ebé halo parte hosi sira ne'ebé iha Beloi aluga kuartu sira ba turista sira - hosi Da Terra, ne'ebé serbisu iha área agríkola, no Maluk Timor ne'ebé dedika ba tema nutrisaun ho feto isin-rua sira ho labarik sira.

Empreza Di'ak hanesan organizasaun timoroan ida, hetan ona prémiu oioin, no ne'ebé promove atu halakon kiak iha Timor-Leste, buka "kapasita nível ekonomia hosi feto ho mane timoroan sira ne'ebé moris iha limite kiak nia okos, liuhosi promosaun ba dalan sustentu foun, oferese formasaun inovadora no apoia kriasaun hosi mikro-negósiu sira hodi harii futuru ida ne'ebé di'ak liu".

Hahú hosi nia kriasaun, iha tinan 2011, empreza serbisu hodi iha kbiit ekonómiku ba ema rihun lima resin iha rejiaun oioin nasaun nian, liuhosi "investigasaun, teste ho implementasaun hosi oportunidade sustentável sira" no nia objetivu maka "halakon siklu kiak nian, kontribui ba dezenvolvimentu demokrátiku, inkluzivu ho pasífiku iha Timor-Leste".

Fonte: Ajénsia Lusa

komentáriu sira